By Désirée Attard, published on May 15, 2023

Il-bidu ta’ negozju jew intrapriża ġdida hu perjodu eċitanti u importanti ferm. Fost ħafna affarijiet li ser tkun qed tieħu ħsieb, jista’ jkun ikollok bżonn tikri spazju kummerċjali. F’dan l-artiklu, se nħarsu lejn elementi importanti li trid tqis meta tiġi biex tidħol f’tali kirja.

Qabel ma tikri

Kun ċert li taf dak li qed tfittex fil-post: ser tużah bħala uffiċċju, maħżen, jew ħanut, per eżempju? Il-bżonnijiet tiegħek ser jinfluwenzaw l-għażla tal-post, kif ukoll il-kuntratt tal-kirja fih innifsu.

Il-kuntratt tal-kirja

Importanti li kull kirja issir permezz ta’ ftehim bil-miktub. F’dan il-ftehim, int u s-sid tal-proprjetà ser tkunu qed taqblu fuq ir-relazzjoni kummerċjali tagħkom, u, fost oħrajn, ser tirregolaw dan li ġej:

Il-bidu tal-kirja: Id-data minn meta d-drittijiet u obbligi tagħkom jibdew japplikaw.

It-terminu tal-kirja: Il-perjodu tal-kirja. Hawnhekk jista’ jkollok il-perjodu magħruf bħala ‘di fermo’, li hu l-perjodu minimu tal-kirja, u l-perjodu magħruf bħala ‘di rispetto’, li hu kwalunkwe perjodu minn meta jintemm dak di fermo. Huwa biss fil-perjodu di rispetto li l-kirja tista’ tintemm mingħajr ebda penali jew talba ta’ kumpens, b’terminu ta’ pre-avviż maqbul bejnietkom.

Il-kirja: L-ammont ta’ flus dovuti għall-kirja tal-proprjetà, u l-modalità tal-ħlas, inkluż depożitu.

Xi xogħlijiet: Is-sid ser jagħmel xi xogħlijiet qabel ma jgħaddilek il-kirja? Se jkollok il-permess li tagħmel xi modifiki fil-proprjetà?

L-utilitajiet: Normalment, inti tkun responsabbli li tħallas kontijiet bħalma huma dawk tad-dawl u l-ilma.

Il-komun: Jekk hemm komun mal-proprjetà, hawn tiftiehmu dwar min, jew, il-proporzjon, ta’ ħlas dovut.

Elementi oħrajn: Skont il-ħtiġiet tiegħek, bħal per eżempju il-permessi meħtieġa, it-twaħħil ta’ tabelli, sinjali, eċċetra.

Spejjeż oħrajn: Bħalma huma VAT u spejjeż ta’ aġenti.  

Għal informazzjoni jew pariri dettaljati, ikkuntattja lit-tim ta’ esperti tagħna.

Dan l-artiklu ma jikkostitwixxi bl-ebda mod parir legali. Filwaqt li kemm jista’ jkun, nippruvaw nassiguraw li l-informazzjoni fuq dan is-sit tkun aġġornata, jista’ jkun hemm informazzjoni, materjal, jew kontenut li ma jkunx l-iktar riċenti. Inħeġġuk tikkuntattjana għal parir legali personalizzat.