By Bryony Balzia Bartolo, published on January 14, 2022

Għas‑sigurtà tagħhom u ta’ darhom, ħafna nies illum‑il ġurnata qed jinstallaw CCTV cameras. Iżda x’nistgħu nagħmlu, u x’ma nistgħux nagħmlu f’dar‑rigward? Illum se nagħtu titwila fil‑qosor lejn il‑liġi tal‑protezzjoni tad‑data (jew, kif nafuha, tal‑GDPR) f’dan ir‑rigward.

Nista’ nwaħħal CCTV camera mal-faċċata tad-dar tiegħi?

Xejn ma jwaqqfek milli tinstalla CCTV camera mal-propjetà privata tiegħek, pero jiddependi x’filmati qed jinġibdu, iġifieri sa fejn twassal il‑lenti tal‑camera tiegħek.

Pereżempju, jekk is-CCTV camera qed turi biss il-ġnien jew il-bejt propjetà privata tiegħek u mhux qed jidhru propjetà ta’ terzi jew individwi oħra, din ma taqax taħt il-liġi tal-protezzjoni tad-data. Iżda jekk il‑camera turi wkoll propjetà ta’ ħaddieħor jew post pubbliku (bħat-triq) hemmhekk imbagħad tidħol il-liġi tal-protezzjoni tad-data.

Ma jfissirx li tkun qed tikser il-liġi awtomatikament, pero dan ifisser li trid tara li qed issegwi r-regolamenti u l‑obbligi kollha tal-protezzjoni tad-data. Għal dettal dwar dan, ikkuntattja lit‑tim tagħna.

Allura ma nistax nipproteġi l-propjetà tiegħi billi nwaħħal camera li turi l-bankina wkoll?

F’każijiet bħal dawn, iridu jiġu kkunsidrati numru ta’ fatturi, u kull każ irid jiġi diskuss fil-partikularitajiet tiegħu. Madanakollu, jekk hemm theddida serja, per eżempju ta’ vandaliżmu, minħabba inċidenti li ġraw fil-passat fuq il-propjetà privata tiegħek, jew minħabba numru ta’ rapporti li ġraw fil-viċinanzi, f’dawn il-każijiet jista’ jkun li titħalla tiġbed partijiet minn propjetà ta’ ħaddieħor jew postijiet pubbliċi, jekk dan huwa importanti biex titħares is-sigurtà tiegħek.

Iżda r‑regola kardinali hi, li jekk is-sigurtà tiegħek tista’ tħarisha bl‑inqas kollezzjoni ta’ data, mela allura għandek tiġbed biss il‑minimu neċessarju għal dan.

Barra minn hekk, trid ukoll turi li ma hemmx miżuri oħra li stajt tieħu biex tipproteġi l-propjetà tiegħek. Per eżempju, jekk tista’ tagħmel fencing madwar il-propjetà tiegħek, għandek l-ewwel tagħmel il-fencing qabel ma tinstalla cameras li jiġbdu fuq propjetà privata.

Qed niġbed filmati bis‑sistema ta’ CCTV li installajt. X’inhuma l‑obbligi tiegħi fir‑rigward ta’ dawk il‑filmati, u d‑data li qed inżomm?

F’dan ir-rigward hemm numru ta’ obbligi li trid tħares, fosthom li:

• Tassigura li l-filmat miġbud jinżamm b’mod sigur, u ma jkunx aċċessibli minn ħaddieħor – per eżempju, billi tara li ma tistax tiġi hacked faċilment
• Ma żżommx il‑filmati għal perjodi twal, u tħassarhom regolarment
• Ma tużax il-filmat jew il‑cameras għal għanijiet li mhumiex dawk ta’ sigurtà
• Infurmajt b’mod ċar lin‑nies li jistgħu jinġibdu li hemm sistema li qed tiġbed il‑filmat – per eżempju, b’tabella
• Jekk individwu talbek aċċess għad-data personali li għandek dwaru, inti tipproċessa tali talba.
• F’każ li individwu jitolbok li tħassar filmati tiegħu, tilqa’ din it-talba, sakemm mhux għax għandek bzonn il-filmati, ‑ per eżempju, bħala evidenza f’kawża.

Il-pulizija talbuni ngħaddilhom il-filmat li nġibed mis-CCTV cameras tiegħi. Nista’ ngħaddihulhom?

Mhux talli tista’, talli hu obbligu tiegħek li tagħtihom dak li talbuk.

Il‑ġar għandu sistema ta’ CCTV cameras ippuntati fuq il‑bitħa / gallarija / bejt tiegħi. X’nista’ nagħmel?

Ġeneralment, dan mhux permess, u għandek id‑dritt li ddaħħal ilment quddiem il‑Kummissarju għall‑Protezzjoni tad‑Data. Il‑Kummissarju jinvestiga l‑ilment tiegħek, u, fejn isib ħtija, jista’ jimponi miżuri u multi serji.

Għal informazzjoni jew pariri dettaljati, ikkuntattja lit-tim ta’ esperti tagħna.

Dan l-artiklu ma jikkostitwixxi bl-ebda mod parir legali. Filwaqt li kemm jista’ jkun, nippruvaw nassiguraw li l-informazzjoni fuq dan is-sit tkun aġġornata, jista’ jkun hemm informazzjoni, materjal, jew kontenut li ma jkunx l-iktar riċenti. Inħeġġuk tikkuntattjana għal parir legali personalizzat.