By Désirée Attard, published on January 13, 2022

Malta għadha kemm għaddiet liġi ġdida li tirregola u tkompli tiddekriminalizza l-kannabis. Fost affarijiet oħrajn, il-liġi tintroduċi kunċett ġdid: il-possibilità li kundanna tiġi direġistrata minn fuq iċ-ċertifikat tal-kondotta.

Xi tfisser direġistrazzjoni?

B’direġistrazzjoni nifhmu li kundanna relatata ma’ reat li llum ġie dekriminalizzat (bħal dak relatat mat-tkabbir tal-kannabis, per eżempju) jew dipenalizzat, jista’ jitneħħa minn fuq iċ-ċertifikat tal-kondotta, mingħajr il-bżonn li jgħaddi perjodu ta’ żmien, kif kien il-każ sal-lum-il ġurnata.

Għalfejn saret din il-bidla?

Iċ-ċertifikat tal-kondotta jintalab f’ħafna ċirkostanzi, speċjalment f’dawk professjonali. Il-fatt li tali ċertifikat ma joħroġx ‘nadif’, kif ngħidu, tista’ ttellef ħafna opportunitajiet, inkluż xogħol.

Meta wieħed jikkunsidra l-fatt li reat ma jkunx għadu kkunsidrat bħala tali, allura, wieħed jifhem li ma jkunx ġust li persuna tibqa’ tiġi kkastigata għalih.

Kif nista’ niddireġistra kundanna minn fuq il-kondotta tiegħi?

L-artiklu 8A tal-Ordinanza dwar iċ-Ċertifikati tal-Kondotta jistipula l-proċedura li biha din issir.

Persuna għandha tibgħat talba bil-miktub lid-dipartiment li joħroġ iċ-ċertifikati tal-kondotta, u jitlob formalment li l-kundanna in kwistjoni tiġi direġistrata.

Ladarba d-dipartiment jikkonferma li r-reat filfatt ġie dekriminalizzat jew dipenalizzat, dan jaċċetta t-talba, u jwettaq tali dereġistrazzjoni.

L-avukati tagħna jistgħu jgħinuk tifformula t-talba tiegħek – ikkuntattjana għal iktar informazzjoni.

Dan l-artiklu ma jikkostitwixxi bl-ebda mod parir legali. Filwaqt li kemm jista’ jkun, nippruvaw nassiguraw li l-informazzjoni fuq dan is-sit tkun aġġornata, jista’ jkun hemm informazzjoni, materjal, jew kontenut li ma jkunx l-iktar riċenti. Inħeġġuk tikkuntattjana għal parir legali personalizzat.

Back