By Désirée Attard, published on January 8, 2022

X’inhi s-separazzjoni?

Meta koppja tissepara legalment, l-Istat Malti ikun irrikonoxxa li l-partijiet ma jkunux għadhom jgħixu flimkien. Madanakollu, jibqgħu marbutin bħala konjuġi, u allura, ma jistgħux jerġgħu jiżżewġu. 

Dan hu kunċett u proċess differenti minn dak tad-divorzju, għalkemm wieħed jista’ jqishom simili.

Kif jista’ persuna jissepara legalment?

Separazzjoni legali tista’ ssir:

• Permezz ta’ kuntratt bejn il-miżżewġin, fejn ikun hemm qbil (magħrufa bħala separazzjoni bonarja); jew
• Permezz ta’ sentenza tal-Qorti tal-Familja, fejn il-miżżewġin ma jkunux qed jaqblu fuq kif ir-relazzjoni għandha tintemm.

Fiż-żewġ każijiet, il-proċess dejjem jibda bil-medjazzjoni.

Fejn hemm qbil, il-medjazzjoni sservi bħala tentattiv biex il-koppja, ladarba jiġi stabbilit illi m’hemmx tama ta’ rikonċiljazzjoni, taqbel fuq il-qasma tal-beni u tagħmel arranġamenti dwar l-ulied. Dan il-qbil imbagħad jiġi formalizzat bl-approvazzjoni tal-Qorti, u l-qbil isir il-kuntratt tas-separazzjoni ta’ dik il-koppja.

Ta’ min jgħid hawnhekk illi din hi l-iktar proċedura effiċjenti, peress li tieħu ferm inqas ħin, kif ukoll inqas spejjeż.

Fejn m’hemmx qbil, il-medjazzjoni sservi biex il-koppja tipprova tiftiehem fuq it-termini u kundizzjonijiet tas-separazzjoni. Jekk jibqa’ ma jkunx hemm qbil, imbagħad, il-koppja jkollha tgħaddi biex tiftaħ kawża quddiem il-Qorti tal-Familja.

Xi jrid jiġi deċiż waqt il-proċeduri ta’ separazzjoni?

F’kull każ, il-miżżewġin iridu jaqblu fuq dak kollu li kellhom in komuni tul iż-żwieġ, inkluż, fost oħrajn:

• Id-dar matrimonjali;
• Min se jieħu ħsieb lill-ulied;
• L-aċċess għall-ulied;
• Il-manteniment;
• Il-beni materjali kollha li kellhom fil-komunjoni tal-akkwisti, u kif dawn ser jinqasmu.

X’inhuma l-ispejjeż relatati mal-proċedura ta’ separazzjoni?

L-ispejjeż jistgħu jvarjaw skont il-fatti u l-partikolaritajiet tal-każ, iżda  għandek iżomm f’moħħok li hemm:

• l-ispejjeż tal-Qorti, inkluż notifiki, u prokuratur legali;
• l-ispejjeż tal-medjazzjoni;
• l-ispejjeż tal-avukat tiegħek.

Fejn hemm qbil bejn il-koppja l-ispejjeż se jkunu ferm inqas għaliex jiġu evitati l-ispejjeż relatati mal-kawża.

L-avukati tagħna jagħmlu l-almu tagħhom sabiex jagħtuk stima taċ-ċifra aħħarija qabel ma jinbdew il-proċeduri, għas-serħan il-moħħ tiegħek u tal-familja tiegħek. Ikkuntattjana għal iktar dettalji.

Dan l-artiklu ma jikkostitwixxi bl-ebda mod parir legali. Filwaqt li kemm jista’ jkun, nippruvaw nassiguraw li l-informazzjoni fuq dan is-sit tkun aġġornata, jista’ jkun hemm informazzjoni, materjal, jew kontenut li ma jkunx l-iktar riċenti. Inħeġġuk tikkuntattjana għal parir legali personalizzat.