By Désirée Attard, published on January 8, 2022

F’Diċembru tal-2021, permezz tal-Att LXVI, il-Parlament Malti għamel numru ta’ bidliet konsiderevoli f’dak li għandu x’jaqsam mal-kannabis. Hawnhekk, nagħtu titwila lejn il-bidliet prinċipali.

Iġifieri l-kannabis issa hi legali?

Le – l-emendi iddekriminalizzaw il-pussess (sa ċertu ammonti); il-konsum; u t-tkabbir għal skop personali tal-kannabis.

Xi jfisser fil-prattika?

Il-pussess tal-kannabis fil-pubbliku ġie dekriminalizzat għall-adulti (18-il sena ‘l fuq) b’dan il-mod:

• pussess ta’ 7 grammi jew inqas ma jwassal għall-ebda multa jew konfiska;
• pussess ta’ iktar minn 7 grammi iżda inqas minn 28 gramma jwassal għal multa ta’ bejn €50 u €100, flimkien mal-konfiska tal-kannabis.

Dan kollu ma japplikax għal minuri, li f’kull każ, irrispettivament mill-ammont ta’ kannabis li jkollhom, għandhom jiġu mħarrka quddiem il-Kummissarju għall-Ġustizzja sabiex tingħata pjan ta’ kura jew trattament.

F’kull każ, il-persuna m’għandhiex tinżamm f’kustodja taħt arrest.

Dan ifisser li t-traffikanti tad-droga ma jistgħux jitwaqqfu?

Le. Il-Pulizija, f’kull każ, għandhom id-dmir u s-setgħa li jwaqqfu lil kwalunkwe persuna, jekk ikollhom suspett raġonevoli ta’ traffikar jew tmexxija ta’ drogi.

Bl-emendi legali, nista’ npejjep il-kannabis fejn irrid?

Le. Il-konsum tal-kannabis mhux medika f’post pubbliku jwassal għal penali ta’ €235. Il-konsum tal-kannabis quddiem il-minuri, tkun fejn tkun, twassal għal penali ta’ bejn €300 u €500.

Veru li nista’ nkabbar il-pjanta tal-kannabis f’dari stess?

Iva. Il-liġi issa tagħtik il-jedd li tkabbar sa massimu ta’ erba’ pjanti, u li jkollok id-dar sa massimu ta’ 50 gramma kannabis imnixxfa. Il-pjanti ma jistgħux ikunu jidhru minn barra.

F’kull dar, minkejja li jkun hemm iktar minn abitant wieħed, ma jistax ikun hemm iktar minn erba’ pjanti, jew l-ammont ta’ kannabis niexfa msemmi.

Jekk ma nistax inkabbar f’dari, minn fejn nista’ nġib il-kannabis?

Il-liġi qed toħloq il-kunċett ta’ organizzazzjonijiet li l-iskop tagħhom ikun li jikkultivaw u jqassmu l-kannabis lill-membri tagħhom. Il-membri ta’ dawn l-organizzazzjonijiet, li jrid ikollhom ‘il fuq minn 18-il sena, ikunu jistgħu jieħdu sa massimu ta’ 7 grammi kuljum, b’limitu ta’ 50 gramma fix-xahar, kif ukoll 20 żerriegħa tal-kannabis kull xahar.

Diġà kont instabt ħati ta’ reat relatat mal-kannabis. Veru li nista’ nnaddaf il-kondotta tiegħi?

L-emendi ħolqu mezz ta’ kif wieħed jiddereġistra kwalunkwe reat li m’għadux reat miċ-ċertifikat tal-kondotta tiegħu – ukoll jekk ma jkunx relatat mal-kannabis.

Biex isir dan, trid tintbagħat ittra lill-uffiċju responsabbli għall-ħruġ taċ-ċertifikati tal-kondotta, li tindika liema reat għandu jiġi dereġistrat. Dak l-uffiċju, imbagħad, jikkonferma li r-reat ġie dekriminalizzat jew dipenalizzat, u jilqa’ t-talba.

Dan l-artiklu ma jikkostitwixxi bl-ebda mod parir legali. Filwaqt li kemm jista’ jkun, nippruvaw nassiguraw li l-informazzjoni fuq dan is-sit tkun aġġornata, jista’ jkun hemm informazzjoni, materjal, jew kontenut li ma jkunx l-iktar riċenti. Inħeġġuk tikkuntattjana għal parir legali personalizzat.

Back